中  文
མིང་སྲིང་དཔལ་བགོས་དང་ལྷ་འདོགས
སྤེལ་དུས།  2014-11-18 17:06:11    རྡེབ་ཚད། 

(མིང་སྲིང་དཔལ་བགོས་དང་ལྷ་འདོགས)

(མིང་སྲིང་དཔལ་བགོས་དང་ལྷ་འདོགས)
དཔེ་ཆ་འདི་ནི་བོན་གྱི་གཉེན་སྒྲིག་གི་གནའ་བའི་ཆོ་གའི་སྐོར་ཞིག  འདིའི་ནང་གསེས་ཁག་གཉིས་སུ་ཡོད་པ་དང་། མིང་སྲིང་དཔལ་བགོས་དང་ལྷ་འདོགས་གཉིས་སོ། ནང་གསེས་དང་པོ་དེའི་ནང་དོན་ནི་དང་ཐོག་མི་དང་ལྷ་གཉིས་བར་གཉེན་སྒྲིག་བྱས་ཚུལ་གྱི་གཏམ་རྒྱུད་སྐོར་ཡིན། 
ཡབ་ཅིག་ལྷ་རྗེ་ཟོམ་འབྲང་དང་། ཡུམ་ཅིག་ལྷ་ཟ་གུང་བཙུན་མ། དེ་གཉིས་བཤོས་ཤིང་སྤྲུལ་པའི་སྲས།། མིང་པོ་ལྷ་སྲས་ལྗོན་པ་དང་།། སྲིང་མོ་སྲིད་ལྕམ་འཕྲུལ་མོ་ཆེ།། མཛེས་ཤིང་ཡིད་དུ་འོང་པ་ལ།། ལྷ་མི་ཀུན་གྱི་ཡིད་ཀྱང་ཤོར།། ལྷ་མི་ཀུན་གྱིས་དགོས་སོ་ཟེར།། དུས་དང་སྐལ་པ་དེ་ཙམ་ན།། རྒྱ་རྗེ་ལིང་དཀར་ཞལ་ན་རེ།། བུ་མོ་ང་ལ་དགོས་སོ་ཟེར།། ལྷ་རྗེ་ཟོམ་འབྲང་ཞལ་ན་རེ།། རྒྱ་རྗེ་ལིང་དཀར་ཚུར་གསོན་དང་།། བུ་མོ་སྲིད་ལྕམ་འཕྲུལ་མོ་ནི།། ལྷ་ནས་ལྷ་རུ་འགྲོ་བ་ལ།། མགོ་ནག་མི་ལ་མི་འབྱུང་ངོ།། ཉི་ཟླ་འཆར་ནུབ་བྱེད་པ་དེ།། ནམ་མཁའི་མཐོངས་སུ་བྱེད་པ་ཡིན།། ཐང་ལ་ལྷུང་པ་ཁྱོད་མཐོང་ངམ།། ང་ལ་འགྲན་ཟླ་སུ་ཡང་མེད།། ང་ནི་ནམ་མཁའི་ལྷརིགས་གཙང་མ་ཡིན།། ཁྱོད་ནི་སའི་སྲིན་བུ་མགོ་ནག་ཡིན།། ང་གངས་ཀྱི་དར་སཻང་དཀར་མོ་ཡིན།། ཁྱོད་སའི་སྦུར་པས་ཧུ་མི་ནུས།། དཔེ་ནི་དེ་དང་འདྲ་བ་ཡིན།། རྒྱ་རྗེ་ལིང་དཀར་ཞལ་ན་རེ།། ང་མནའ་མ་ཁུངས་ནས་ལེན་པ་ཡིན།། གཞི་ཡངས་སའི་མི་རྒྱུད་ཡིན།། མི་རབས་འཕེལ་བའི་མགོ་བོ་ཡིན།། མི་དང་ལྷ་རུ་ལྡེབ་ཙ་ན།། མིས་ལྷ་ལ་གསོལ་མཆོད་བྱེད།། ལྷས་མི་ལ་མགོན་སྐྱབས་བྱེད།། དེ་ཡང་གཅིག་དྲིན་གཅིག་ལ་ཆེ།། གནམ་ལ་ཉི་ཟླ་ཤར་བ་ཡང་།། འོད་ཟེར་ས་ལ་འབྱུང་བ་ལགས།། ས་ལས་དྲོད་སླང་རྡོལ་པ་ཡང་།། ནམ་མཁའི་སྤྲིན་དུ་འགྲོ་བ་ལགས།། དཔེ་ནི་དེ་དང་འདྲ་བ་ཡིན།། བུ་མོ་བདག་ལ་གནང་བར་ཞུ།། ལྷ་རྗེ་ཟོམ་འབྲང་ཞལ་ན་རེ།། ཁྱོད་མི་ཆུང་སྨྲ་མཁས་ལྕེ་བདེའོ།། སྨྲ་བའི་དོན་དེ་དོན་ཆེན་འདྲ།། ངའི་བུ་མོ་འདོད་པ་ན།། རིན་དུ་གསེར་གཡུ་རིན་ཆེན་དང་།། ལྷ་གཡུ་དེ་ནི་འོད་འབར་དང་།། བསེའི་དེ་ནི་གོས་བདུན་དང་།། ལྷ་རྟ་དེ་ནི་ངང་དཀར་དང་།། ལྷ་གཡག་དེ་ནི་ཞོལ་ཆེན་དང་།། ལྷ་ལུག་དེ་ནི་ཁྱུ་བདུན་དང་།། ལྷ་ར་དེ་ནི་ཞལ་དཀར་དང་།། ལྷ་མདའ་དར་གྱིས་བརྒྱན་པ་དགོས།། རང་དབང་ཆེ་བ་བུ་མོའི་ཕ།། ཕ་ལ་ལྷ་རྟ་སྲབ་སྦྲེལ་དགོས།། མ་ལ་ལྷ་འབྲི་ཟལ་དཀར་དགོས།། མིང་ཅིག་སྲིང་ཅིག་མིག་དང་འདྲ།། མིང་ལ་སྤྱན་རྟེན་གསེར་གཡུ་དགོས།། ཉེ་བ་འཁོར་གཡོག་ལུས་དང་འདྲ།། ལུས་རྟེན་དར་དཀར་ཡུག་གཅིག་དགོས།། མགོ་བའི་ལྷ་ལྔ་མཆོད་པ་ལ།། ལྷ་ཕྱེ་དང་ནི་ལྷ་མར་དང་།། ལྷ་ཤ་ཕུད་དུ་མ་ཉམས་པ།། གླང་ཆེན་ཁལ་དུ་ལོང་པ་དགོས།། བུ་སྲིང་དཔལ་དགོས་བྱེད་པ་ལ།། ལྷ་བོན་ཐོད་དཀར་ཞལ་ན་རེ།། ལྷ་ཐོད་རྒྱ་མོའི་དར་ཐོད་དགོས།། ལྷ་རྟེན་དར་ཡུག་གོས་ཡུག་དགོས།། དཔལ་གྱི་བགོ་བཤའ་བྱེད་པ་ལ།། དཔལ་གཞི་དར་གྱི་ལྷ་གདན་དགོས།། ལྷ་ཤོ་གྱེན་དུ་སྒྲིལ་བ་ལ།། ཤོ་གདན་དར་དཀར་ཡུག་གཅིག་དགོས།། འདྲེ་ཤོ་ཐུར་དུ་སྒྲིལ་བ་ལ།། ཤོ་གདན་དར་ནག་ཡུག་གཅིག་དགོས།། ངའི་བུ་མོ་འདོད་པ་ན།། དེ་རྣམས་ལྷ་བོན་ཕྱག་དུ་ཕུལ།། གཉེའུ་མི་བདུན་ཐོང་ཞིག་གསུངས།། ཡབ་ཀྱི་དྲུང་དུ་བུ་མོ་བྱོན།། བུ་མོ་དེའི་ཞལ་ན་རེ།། ཨ་བོ་ཡབ་ཅིག་ཚུར་གསོན་དང་།། བུ་མོ་མི་ཡུལ་སྤྱུག་པ་ན།། མ་དང་ཕ་ཚན་སྤུངས་ན་འགྲོ། དཔལ་དང་གཡང་དུ་ཕྱེ་བ་ཡང་།། ཐམས་ཅད་འཚོགས་པའི་བསོད་ནམས་ཡིན།། དཔལ་དང་གཡང་གི་སྐལ་བ་དགོས།། བུ་མོས་དེ་སྐད་ཞུས་པ་དང་།། ཡབ་ཀྱི་ཞལ་ནས་འདི་སྐད་གསུངས།། བུ་མོ་སྲིང་ལྕམ་ཚུར་གསོན་དང་།། ཧ་ལའི་ཤིང་ཡང་དུག་གི་རྒྱུ།། ཤིང་ཕ་ཚན་ཆེ་བ་མེའི་རྒྱུ།། ཚྭ་རོ་མཆོག་ལྡན་པ་ཟས་ཀྱི་བཅུད།། བུ་མོ་སྐྱེས་པ་མིའི་དཔལ།། ཁ་བ་བབ་པ་རིའི་གོས།། བུ་མོ་གྲུང་ཡང་མིའི་གཡོག། དཔལ་གྱི་སྐལ་བ་མི་སྟེར་ཟེར།། བུ་མོས་སྨོན་ལམ་འདི་ལྟར་བཏབ།། རྟ་འོལ་པ་ཅིག་གི་བརྟོད་ལུགས་ཀྱི།། སྟེང་ན་མཉའ་ནོན་ཡོང་པ་འདྲ།། རྒལ་ཁྱེར་ནད་འཁྲུགས་ཅན་དང་མ་འཕྲད་ཅིག། ལུག་གཡང་དཀར་ཅིག་གིས་འཁྲིད་ལུག་ཀྱི།། སྲིན་པོ་ངོ་དམར་ཅིག་གི་ལག་ཏུ་འགྲོ་འགྲོ་འདྲ།། ཤན་པ་གྲི་ཐོགས་ཅིག་དང་མ་འཕྲད་ཅིག། དཔལ་གྱི་སྐལ་བ་སྤྱོད་ལུགས་ཀྱི།། ས་ཐག་རིང་ཅིག་ཏུ་སྤྱུག་པ་འདྲ།། མི་ངན་ཐར་མེད་ཅིག་དང་མ་འཕྲད་ཅིག། ཨ་བོ་ཁྱོད་ཀྱི་སྐུ་དྲིན་གྱི།། དཔལ་དང་བསོད་ནམས་མ་ཆུང་ཅིག། ཁ་རྗེ་བསོད་ནམས་ཆེ་བར་ཤོག། བུ་མོའི་ཞལ་ནས་དེ་སྐད་གསུངས།། རྒྱ་རྗེ་ལིང་དཀར་ཞལ་ན་རེ།། ལྷ་རྟ་དང་ནི་ལྷ་གཡག་དང་།། ལྷ་ལུག་དང་ནི་ལྷ་ར་དང་།། དར་དཀར་ལྷ་ཐོད་ལ་སོགས་པ།། བོན་ལ་དགོས་པའི་རྫས་རྣམས་དང་།། བུ་མོའི་རིན་དུ་དགོས་པ་རྣམས།། ཐམས་ཅད་ཚང་མར་སྩལ་ནས་ནི།། གཉེའུ་མི་བདུན་ཕྱག་དུ་འབུལ།། གཉེའུ་དེའི་མི་བདུན་གྱི།། འགྱོགས་པའི་རྟ་ཕོ་རེ་རེ་ཞོན།། ལྷ་ཡུལ་དེ་ནི་དབྱིངས་སུ་བྱོན།། དཀོར་ཆ་དེ་ནི་སྣ་ཚོགས་དང་།། བུ་མོ་སྲིང་ལྕམ་རིན་དུ་ཕུལ།། ལྷ་མདའ་དར་གྱིས་རྒྱན་པ་དེ།། མགོ་བའི་ལྷ་ལྔའི་རྟེན་དུ་ཕུལ།། ཡབ་ལ་ལྷ་རྟ་སྲབ་སྦྲེལ་ཕུལ།། མ་ལ་ལྷ་འབྲི་ཟལ་དཀར་ཕུལ།། མིང་ལ་སྤྱན་རྟེན་གསེར་གཡུ་ཕུལ།། འཁོར་གཡོག་རྣམས་ལ་གོས་དར་ཕུལ།། ལྷ་བོན་ཐོད་དཀར་སྤྱན་དྲངས་ནས།། ལྷ་བོན་དབུ་ལ་ཐོད་ཅིག་བཅིང་།། འོག་ཏུ་ཟ་འོག་གདན་ཡང་བཏིང་།། ལྷ་ལ་ལྷ་རྟེན་སེར་གཡུ་དང་།། དར་ཡུག་གོས་ཡུག་ལ་སོགས་པ།། དགོས་པ་ཚང་མ་ཕུལ་ནས་ནི།། ལྷ་བོན་ཐོད་དཀར་ཞལ་ན་རེ།། མིང་སྲིང་དཔལ་བགོ་བྱེད་པ་ལ།། མི་འཚལ་བྱ་བ་དགུ་ཅིག་འཚལ།། ཤེལ་གྱི་དེ་ནི་ཆོ་ལོ་འཚལ།། དར་གྱི་དེ་ནི་གཞི་ཡང་འཚལ།། དཔལ་གཤོས་དེ་ནི་ཟུར་གསུམ་འཚལ།།   
དར་གྱི་དེ་ནི་གཞི་ཡང་འཚལ།། དཔལ་གཤོས་དེ་ནི་ཟུར་གསུམ་འཚལ།། ལྷ་མདའ་དེ་ནི་སྒྲོ་དཀར་འཚལ།། དཔའ་ཆང་དེ་ནི་ཏིང་འཚལ།། གསེར་འཕང་དེ་ནི་གཡུ་ལོ་འཚལ།། ལག་ངར་གཞུ་མཆོག་གཡས་པ་འཚལ།། དར་གྱི་དེ་ནི་ཐོད་དཀར་འཚལ།། དར་ཚོན་དེ་ནི་སྣ་ལྔ་འཚལ།། ལྷ་ནས་ལྷ་ཤ་ལ་སོགས་ཀུན།། ལྷ་བོན་ཐོད་དཀར་ཕྱག་ཏུ་ཕུལ།། བུ་མོ་སྲིང་ལྕམ་འཕྲུལ་མོ་དེ།། ཡབ་ལ་ཡི་ཆད་ཕུལ་བ་དང་།། དེ་ནས་ཡབ་ཀྱི་ཞལ་ན་རེ།། བུ་མོ་ཡི་ཆད་མ་ལྡང་ཅིག། ངའི་ཁ་ཏ་ཚིག་གསུམ་འདི།། ཕ་ཕོག་མོ་རྫོང་རྟེན་འབྲེལ་ཆེ།། བུ་མོ་ཁྱོད་ལ་རྫོངས་སུ་འདེབས།། དཔལ་མིང་ཤོ་སྡུར་གྱིས།། མདའ་ལ་ཡོན་ཏན་བསམ་མི་ཁྱབ།། མདའ་མོ་དར་གྱིས་བརྒྱན་པ་འདི།། མོ་སྲིད་ཕོ་རུ་འཕེལ་བ་ཡིན།། མདའ་ལྟོང་གནམ་ལ་བསྟན་པ་འདི།། ཁ་རྗེ་དགུང་དང་མཉམ་པ་ཡིན།། སྙུག་མ་ཚིགས་གསུམ་ཡོད་པ་འདི།། ལུས་ངག་ཡིད་དང་གསུམ་པོའི་དོན།། མདེའུ་ལྕགས་ལ་བྱས་པ་འདི།། འདྲེ་གདོན་སྙིང་ལ་རྒྱབ་པ་ཡིན།། གྲུམ་པའི་རི་མོ་བཏགས་པ་འདིས།། མི་ཁ་འགོང་བོ་ཐུབ་པ་ཡིན།། ཁབ་དང་སྐུད་པས་རྒྱན་པ་འདི།། ཕར་བཏང་ཚུར་མི་ལྡོག་པའི་དོན།། བུ་མོ་ཞལ་ནས་འདི་སྐད་གསུངས།། ཨ་མ་ཡུམ་ཅིག་ཚུར་གསོན་དང་།། ཕ་དྲིན་ཐ་མ་ནོར་རྫོང་ཡིན།། མ་དྲིན་ཐ་མ་གཡུ་གོས་ཡིན།། བུ་མོ་མི་ཡུལ་སྤྱུག་པ་ལ།། དཔལ་གྱི་སྐལ་བ་མི་ཆུང་དགོས།། ཡུམ་གྱི་ཞལ་ནས་འདི་ལྟར་གསུངས།།
བུ་མོ་སྲིང་ལྕམ་ཚུར་ཉོན་དང་།། བུད་མེད་བྱ་བ་སྲིན་གྱི་རིགས།། མོ་རིགས་བྱ་བ་བསམ་པ་ངན།། བུ་སྲིང་བྱ་བ་མི་མ་ཡིན།། བུད་མེད་བྱ་བ་མི་ཡིན་ན།། མིའི་ཡུལ་དུ་ག་ལ་སྤྱུག། བུ་མོ་བྱ་བ་སྙིང་རེ་རྗེ།། བུ་སྲིང་བྱ་བ་ཡིད་རེ་མུག། ཁྱོད་བུ་མོ་མི་དཔལ་བྱེད་པ་ལ།། དཔལ་གྱི་སྐལ་བ་མི་ཡོང་ངོ་།།  
དེ་སྐད་ཡུམ་གྱིས་གསུངས་པ་དང་།། བུ་མོའི་མིག་ནས་མཆི་མ་བྱུང་།། མཆི་མ་གཏོང་གིན་འདི་སྐད་སྨྲ།། ཁྱོ་བོ་འཁོར་གཡོག་གཏན་གྱི་གྲོགས།། བུ་མོ་ལན་ཆགས་དགྲ་ཡིན་པས།། ངོ་མི་ཤེས་པའི་ཡུལ་དུ་སྤྱུག། སྐྱིད་ན་མིའི་དཔལ་རྒྱན་ཡིན། སྡུག་ན་མའི་སེམས་ཁྲལ་གནོན།། ས་ཐག་རིང་དུ་སྤྱུག་ཙམ་ན།། ཕ་མས་བུ་མོ་མཐོང་བ་དཀའ།།
མིང་པོའི་ཞལ་ནས་འདི་སྐད་གསུངས།། བུ་སྲིང་བྱ་བ་སྙིང་རེ་རྗེ།། ཐག་ཉེ་བུ་མོ་ཕ་མས་སྐྱོང་།། བུ་མོ་འདི་ཡང་མི་སྡུག་པར།། དཔལ་དང་བསོད་ནམས་མ་ཆུང་ཅིག ཨ་མ་ཡུམ་གྱི་ཞལ་ན་རེ། ཨ་མའི་ཁ་ཏ་ཚིག་གསུམ་འདི།། ཨ་མའི་གསེར་འཕང་འདི་ལ་ཚང་།། བུ་མོ་ཁྱོད་ལ་རྫོངས་སུ་བསྐུར།། མའི་ཁ་ཏ་འདི་ལ་ཉོན། རྫོངས་དཀར་རབ་ཅིག་འདི་ལ་ཚང་།། འཕང་ལ་གཏན་ཚིགས་འདི་ལྟར་ཡོད།། འཕང་རྩེ་གནམ་ལ་བསྟན་པ་འདི།། འདུ་བྱེད་གླིང་དུ་འགྲོགས་པའི་དོན།། འཕང་སྨད་ཟླུམ་ལ་འདྲིལ་བ་འདི།། དཔལ་དང་ནོར་གྱིས་ཁེངས་པའི་དོན།།  འཕང་སྐེད་དྲང་ལ་འདྲིལ་བ་འདི།། གཡོ་སྒྱུ་ཟོལ་ཟོལ་ཆུང་བ་ཡིན།། རྪེ་ལ་བལ་འདབ་དཀྲིས་པ་འདི།། ལས་དང་འབྲེལ་བ་རྒྱུན་ཆད་མེད།། ཕྱི་ནང་གང་དུ་འདྲིལ་ཡང་འདྲེལ།། འདུ་བྱེད་མྱུར་དུ་འགྲུབ་པ་ཡིན།། འདི་བུ་མོ་ཁྱོད་ལ་རྫོངས་སུ་བསྐུར།། འདི་ཡང་བུ་མོའི་དཔལ་དུ་ཆེ།། ཨ་མའི་ཁ་ཏ་འདི་ལ་ཉོན།། མཛད་སྤྱོད་ཐམས་ཅད་མི་དང་བསྟུན།། སྨྲ་བའི་ཚིག་ཀུན་འཇམ་ལ་ལོང་།། འགྲོགས་པའི་མི་དང་འགྲོགས་ཤེས་གྱིས།། རྒན་པ་རྣམས་ལ་ཁུར་ཤེས་གྱིས།། ཡ་རབས་རྣམས་རྣམས་ནི་ཕུད་དུ་མཆོད།། ཡ་རབས་རྣམས་ནི་མཐའ་ན་སྐྱོངས།། བུ་དང་ཁྱོ་གཉིས་ལྷ་རུ་ཁུར།། ཡོད་པའི་དུས་སུ་ཞིབ་ལ་ལོང་།། མེད་པའི་དུས་སུ་མོ་བསོད་སྐྱེད།། དགོས་པའི་དུས་སུ་རྩིང་ལ་ཆོད།། ཞིམ་ངར་ཟས་རྣམས་མི་ལ་བྱིན།། འཇམ་ལེགས་གོས་རྣམས་རང་གིས་གོན།། ཟས་ཁྲེལ་ཁ་ལ་མ་བཀུར་ཅིག། ལུས་ཁྲེལ་གོས་ལ་གལ་མ་ཆུང་།། ཟེར་ལོ་འདུག་ལོ་མ་ཟེར་ཅིག། བྱ་བ་སྤྱན་ལམ་གང་བྱེད་ཀྱང་།། ཡ་རབ་རྣམས་ཀྱི་ཚུལ་དུ་གྱིས།།
བུ་མོའི་ཞལ་ནས་འདི་སྐད་གསུངས།། ཇོ་ཇོ་མི་ངོ་ཚུར་གསོན་དང་།། སྲིང་མོ་མི་ཡུལ་འགྲོ་བ་ལ།། བུ་མོ་མི་འགྲོ་རང་དབང་མེད།། ཡུལ་མ་འདྲིས་གཤིན་ཡུལ་སྐྱ་མོ་དྲ།། ཁྱིམ་མ་འདྲིས་ལྕགས་ཀྱི་ཐ་རམ་འདྲ།། མི་མ་འདྲིས་སྲིན་པོ་གདོང་དམར་འདྲ།། ཁྱི་མ་འདྲིས་རི་ཁྱི་སྔོ་ཆུང་འདྲ།། ཟ་ཚང་ནང་ནས་ཅིག་པོར་བཀར།། འཇིག་རྟེན་བྱ་བ་ཁུར་པོ་ཆེ།། དུས་ཚོད་ངན་པ་ཞེ་རེ་སྐྱོ།། གྲོགས་ཁུར་སྤྱི་ན་སེམས་རེ་ཕམ།། མི་གཡོག་བྱས་པས་ཡིད་མི་དགའ།། མིང་པོ་སྙིང་ཐག་རིང་ངམ་ཐུང་།། དཔལ་གྱི་བགོས་ཆ་ཐོང་ཅིག་ཞུ།།
ལྷ་སྲས་མིང་པོའི་ཞལ་ན་རེ།། ཨ་ཅེ་སྲིང་མོ་ཚུར་གསོན་དང་།། ཕུགས་ཀྱི་སྐྱིད་སྡུག་གང་ཡིན་ཀྱང་།། འཕྲད་ཉིད་འདུན་མ་འདི་ལྟར་ཡིན།། བུ་སྲིང་སྐྱིད་པའི་ས་རུ་རྫོང་།། མནའ་མ་མཛངས་པའི་ཁུངས་ནས་ལེན།། ཁྱོད་ཀྱི་བྱ་བ་འདི་ལྟར་གྱིས།། མཛད་སྤྱོད་ཐམས་ཅད་མི་དང་བསྟུན།། དད་པ་བོན་གྱི་ཕྱོགས་སུ་སྐྱོང་།། མཉམ་པོ་བྱུང་ན་བཀའ་ཁུར་གྱིས།། འགྲངས་ལྟོགས་དམྱལ་བའི་ཡུལ་དུ་ཡོད།། འབྲོས་དེད་སྲིན་པོའི་ཡུལ་ན་ཡོད།། ལེགས་ཉེས་རྒྱལ་པོའི་གྲོས་ལ་ཡོད།། འབྲུག་གི་སྒྲ་ནི་དབྱར་དུ་སྒྲོགས།། མེ་ཏོག་ལེགས་ཀྱང་སྟོན་དུ་སྐམ།། མ་སྐམ་བར་དུ་མཆོད་པ་ཕུལ།། ལོ་བཅུ་ཚུན་ཆད་མིའི་གཡོག། དེ་ནས་མིའི་དཔལ་རྒྱན་ཡིན།། མ་སྡུག་པར་དུ་སྐྱིད་པར་མཛོད།། མུ་མོའི་བུ་ལ་ཕ་ཡུལ་མེད།། ཉི་མ་དེ་རིང་ཕན་ཆད་ནས།། རང་ཚོད་རང་གིས་མ་ཟིན་ན།།   ཕ་མའི་སློབ་རྒྱུ་གང་ལ་ཡོད།། ཕ་ནི་བཙན་པོའི་མཁར་སྤེ་ཡིན།། མ་ནི་ནོར་གྱི་བང་མཛོད་ཡིན།། མིང་པོ་རྒྱབ་ཀྱི་རྟེན་མ་ཡིན།། ཞང་པོ་མདུན་གྱི་མཁར་བ་ཡིན།། དཔོན་པོ་བློའི་གཏོད་ས་ཡིན།། འཁོར་གཡོག་བཤོས་ཞིང་མུ་མ་ཡིན།། སྲིང་མོ་མི་སྡུག་སྐྱིད་པར་མཛོད།། ང་མིང་གི་གཡུ་ཆུང་གྲུ་དམར་འདི།། སྲིང་མོ་ཁྱོད་ལ་རྫོངས་སུ་བསྐུར།། གཡུ་མིག་དོད་ལ་སྲ་བ་འདི།། ཤེས་རིག་ཁོང་ནས་རྒྱས་པ་ཡིན།། གཡུ་ལ་གངས་རི་ཡོད་པ་འདི།། ཕོ་ལྷ་སྒྲ་ལྷ་ཆགས་པའི་དོན།། གཡུ་ལ་མཚོ་མོ་ཡོད་པ་དེ།། མ་ལྷ་མོ་སྨན་ཆགས་པའི་དོན།། གཡུ་མདོག་མདངས་དང་ལྡན་པ་འདི།། གཞན་རྣམས་ཟིལ་གྱིས་གནོན་པའི་དོན།། བཏགས་ན་རྗིད་དུ་ཆེ་བ་འདི།། མོ་ཁྱད་གཡུས་འབྱེད་པ་ཡིན།། མིང་གིས་དེ་སྐད་གསུངས་པ་དང་།།
ལྷ་བོན་ཤོད་དཀར་ཞལ་ན་རེ།། མིང་པོ་གྲལ་གྱི་གཡས་སུ་བཕག། སྲིང་མོ་གྲལ་གྱི་གཡོན་དུ་བཞག། ལྷ་རྗེ་ཟོམ་འབྲང་ཞལ་ན་རེ།། ལྷ་བོན་ཐོད་དཀར་ཚུར་གསོན་དང་།། མིང་པོ་དཔལ་གྱི་ཇི་ཙམ་དབང་།། སྲིང་མོ་དཔལ་གྱི་ཇི་ཙམ་དབང་།། ལྷ་བོན་ཐོད་དཀར་ཞལ་ན་རེ།། མིང་པོ་དཔལ་གྱིས་གསུམ་གཉིས་དབང་།། སྲིང་མོ་དཔལ་གྱིས་གསུམ་ཆ་དབང་།།
ཨ་མ་ཡུམ་གྱི་ཞལ་ན་རེ།། ཡབ་དང་ལྷ་བོན་ཚུར་གསོན་དང་།། བུ་ཚ་མིང་སྲིང་གཉིས་པོ་ལ།། དཔལ་ལ་ཆེ་ཆུང་ཡོད་པ་འདི།། འདི་ནི་ཅིའི་དོན་དུ་བདའ།། སྲིང་མོའི་ཞལ་ནས་འདི་སྐད་གསུངས།། ཕ་ཅིག་མ་ཅིག་སྙིང་དང་འདྲ།། མིང་ཅིག་སྲིང་ཅིག་མིག་དང་འདྲ།། བུ་སྲིང་དཔལ་མེད་ཆུ་ཆད་འདྲ།། དཔལ་ལ་ཆེ་ཆུང་མི་འབྱེད་འཚལ།། ལྷ་བོན་ཐོ་དཀར་ཞལ་ན་རེ།། མིང་པོའི་ལོ་ནི་བཅོ་བརྒྱད་ལོན།། སྲིང་མོ་ལྔ་གསུམ་བཅོ་ལྟ་ལོན།། མིང་པོ་དཔལ་གྱི་གསུམ་གྱིས་དབང་།། སྲིད་མོ་དཔལ་གྱི་གསུམ་ཆ་ཁྱེར།། ཡབ་ཀྱི་ཞལ་ནས་འདི་སྐད་གསུངས།། ཕ་མཉམ་མ་རུ་མཉམ་ལགས་ཏེ།། བསོད་ནམས་དེ་ནི་ཚོགས་མ་ཉམས།། བུ་མོ་སྐྱེས་པ་མིའི་དཔལ།།   དཔལ་གྱི་གསུམ་ཆས་ཆོག་པ་ཡིན།། དེ་སྐད་ཡབ་ཀྱིས་གསུངས་པ་དང་།། བུ་མོའི་མིག་ནས་མཆི་མ་བྱུང་།། ལྷ་བོན་ཐོད་དཀར་ཞལ་ན་རེ།། མ་དང་བུ་མོ་ཚུར་གསོན་དང་།། ཕ་མཉམ་མ་རུ་མཉམ་ལགས་སྟེ།། བསོད་ནམས་དེ་ནི་ཚོགས་མ་མཉམ།། མཆི་མ་གཏོང་བས་མི་ཕན་གསུངས།།
དུས་དང་སྐལ་པ་དེ་ཙམ་ན།། ལྷ་བོན་དེ་ནི་ཐོད་དཀར་གྱིས།། འགྱིང་ཐོད་དཀར་པོ་དབུ་ལ་བཅིངས།། ཕྱག་ཏུ་ལྷ་མདའ་སྒྲོ་དཀར་བསྣམས།། མདུན་དུ་ཤོ་གདན་གོང་འོག་བཏིང་།། ལྷ་བོན་ཐོད་དཀར་ཞལ་ན་རེ།། མིང་པོ་སྲིད་རྗེ་འབྲང་དཀར་དང་།།   སྲིང་མོ་སྲིད་ལྕམ་འཕྲུལ་མོ་ཆེ།། དང་པོ་ཡབ་གྱི་སྟ་་ལ་བབ།། དེ་ནས་ཡུམ་གྱི་མངལ་དུ་ཆགས།། ཡབ་ཡུམ་གཉིས་ལ་འཁྲུངས་པའི་སྲས།། དང་པོ་བྱུང་བའི་ཁུངས་གཅིག་ཀྱང་།། བར་དུ་གནས་པའི་ས་མི་གཅིག། ཕ་ཤུལ་བུས་འཛིན་པ་ཡིན།། དེ་ལ་བུ་མོས་འགྲན་ཟླ་མེད།། བུ་མོ་མི་ཡུལ་འགྲིམ་པ་ཡིན།། དེ་གཉིས་སྲིད་པ་སོ་སོ་ཡིན།། གཅིག་དུ་འདུས་པ་མ་ཡིན་ནོ།། ཉོན་ཅིག་དང་སྲིད་པ་ལྕམ་དྲལ་གཉིས།། དང་པོ་གནམ་སྟོང་སྲིད་པའི་དུས།། སྲིད་པའི་བུ་རུ་སྐྱེས་ཙམ་ན།། མ་ལ་བུ་ཅིག་སྐྱེས་སོ་ཟེར།། སྐྱེས་པས་ཕ་ཡུལ་འཛིན་ནོ་ཟེར།། ཕ་ཤུལ་བུས་བྱེད་དོ་ཟེར།། མིང་པོ་སྲིད་རྗེ་འབྲང་དཀར་ཁྱོད།། ལྟ་ཤོ་དཀར་པོ་འབྲུག་རིས་འདི།། དེ་རིང་མིང་པོའི་ཕྱག་དུ་ཕུལ།། རྒྱན་ཁ་ལྷ་ལ་གཡར་རོ་གྱིས།། རྒྱན་གཞི་དཀར་སྟེང་ཤོ་འདི་རྒྱོབ།།
(མིང་སྲིང་དཔལ་བགོས་དང་ལྷ་འདོགས)
སྲིད་རྗེ་འབྲང་དཀར་ཞལ་ན་རེ།། ཕོ་ལྷའི་ཤོ་རྒྱག་ཡས་ནས་བརྒྱག། སྒྲ་ལྷའི་ཤོ་བརྒྱག་གཡོན་ནས་བརྒྱག། སྲོག་ལྷའི་ཤོ་རྒྱག་མདུན་ནས་བརྒྱག། ཡུལ་ལྷའི་ཤོ་རྒྱག་རྒྱབ་ནས་བརྒྱག། ཕ་ཡུལ་འཛིན་པའི་ཤོ་ཅིག་བརྒྱག། བརྒྱབ་པའི་རྒྱན་ནི་མི་ཆུང་པས།། ལྷའི་སྐལ་བ་ཆེ་བར་འོང་།། ལག་ངར་གནམ་ལ་ཕྱར་བ་འདི།། ཕ་ཡུལ་འཛིན་པའི་ཤོ་ཅིག་བརྒྱག། ལྷ་བོན་ཐོད་དཀར་ཞལ་ན་རེ།། བུ་མོ་སྲིང་ལྕམ་ཚུར་ཉོན་དང་།། དང་པོ་གནམ་སྟོང་སྲིད་པའི་དུས།། སྲིད་པའི་མོ་རུ་སྲིད་ཙམ་ན།། མ་ལ་བུ་མོ་སྐྱེས་སོ་ཟེར།།   བུ་མོ་སུ་ལ་སྟེར་རམ་ེར།། བུ་མོ་སྐྱེས་པའི་ནང་ཕྱོགས་ནས།། ལྷ་ལ་མཆོད་ཡར་བྱེད་པ་མེད།། ཕྱེ་མར་གནམ་དུ་གཏོར་བ་མེད།། གལ་ཏེ་བུ་མོ་གྲུང་སྲིད་ནང་།། མིའི་དཔལ་དུ་ཆས་པ་ཡིན།། གྲུང་ཡང་ཕ་ཡུལ་བཟུང་བ་མེད།། གལ་ཏེ་བུ་མོ་རུལ་བ་ན།། མིའི་བྱུར་དུ་ཆས་པ་ཡིན།། བྱུར་གྱིས་གོ་ཉལ་བྱས་པ་མེད།། བུ་མོ་སྲིད་ལྕམ་འཕྲུལ་མོ་ཁྱོད།། བུ་མོ་མི་ཡུལ་འགྲོ་བ་དང་།། མིང་པོས་ཕ་ཡུལ་ལེན་པ་ལགས།། རང་རང་དགོས་པའི་དཔལ་རེ་ཡོད།།   དཔལ་ཤོ་སྨུག་པོ་འབྲུག་རིས་འདི།། བུ་མོ་ཕྱག་ཏུ་འདི་སྣོམ་ལ།། གདན་གཞི་འོག་ཏུ་ཤོ་འདི་རྒྱོབ།། བུ་མོ་སྲིད་ལྕམ་འཕྲུལ་མོ་དེས།། དངུལ་དཀར་མེ་ལོང་གཏོལ་ནས་དཀྲོ། ནས་སྔོན་འབྲུ་བདུན་གནམ་དུ་གཏོར།།   བུ་མོ་ང་ལ་ལྷ་ཡོད་ན།། དེ་རིང་མགོན་དང་སྐྱོབ་མཛོད་ཅིག།    ལྷ་ཤོ་མོ་ལྷ་བཙན་པོས་མཛོད།། དཔང་པོ་སྒྲ་ལྷ་གཉན་པོས་མཛོད།། མོ་ལྷ་སྨན་གྱིས་ཤོ་རྒྱབ་པོ།། བུ་མོ་སྲིད་ལྕམ་ཞལ་ན་རེ།། ལྷ་བོན་ཐོད་དཀར་ཚུར་གསོན་དང་།།    ཤོ་མིག་ཉག་དང་གླུད་་དུ་བྱུང་།།   བུ་མོ་མི་ཡུལ་འགྲོ་བ་ལ།། ཆོ་ལོ་དེ་ལས་འོས་མེད་དོ།།   བུ་མོས་ཕ་ཡུལ་མི་འཛིན་ཡང་།།   མིང་ཅིག་སྲིང་ཅིག་ཡིན་པ་ལ།  བགོས་པའི་དཔལ་ལ་ཆེ་ཆུང་མེད།།   ཕྱེད་དེ་བདག་ལ་གནང་བར་ཞུ།། བུ་མོས་དེ་སྐད་ཞུས་པ་དང་།།   ལྷ་བོན་ཐོད་དཀར་ཞལ་ན་རེ།།   ད་ནི་མིང་སྲིང་དཔལ་བགོ་འཚལ།། ཕོ་དཔལ་གསུམ་གཉིས་མིང་གིས་ཐོབ།།   མོ་དཔལ་གུསམ་ཆ་སྲིང་གིས་ཐོབ།།   དེ་ནས་དབུའི་རྒྱན་བགོས་པས།། རྒྱལ་རྨོག་གླིང་གཞིའི་མིང་གིས་ཐོབ།།   ཀོ་དཀར་འཛིན་ཞུ་སྲིང་གིས་ཐོབ།།   དེ་ནས་འགུལ་གྱི་རྒྱན་བགོསགཔས།། གསེར་གཡུ་འོད་ལྡན་མིང་གིས་ཐོབ།།   གཟི་འཆོང་དུང་གསུམ་སྲིང་གིས་ཐོབ།།   དེ་ནས་དཔལ་དང་གཡང་བགོས་པས།། འབྲང་རྒྱས་ཞལ་དཀར་མིང་གིས་ཐོབ།།   སྨན་བཤོས་ཟླུམ་པོ་སྲིང་གིས་ཐོབ།། དེ་ནས་ཞལ་གྱི་ཟས་བགོས་པ།། དྲག་བཤོས་ཟུར་གསུམ་མིང་གིས་ཐོབ།། ཟས་མང་ཞལ་མང་སྲིང་གིས་ཐོབ།།   དེ་ནས་ཕྱག་གི་ཆས་བགོས་པའི།།   ལྷ་མདའ་སྒྲོ་དཀར་མིང་གིས་ཐོབ།།   དེ་ནས་ཕྱག་གི་ཆས་བགོས་པའི།། ལྷ་མདའ་སྒྲོ་དཀར་མིང་གིས་ཐོབ།།   གསེར་འཕང་གཡུ་ལོ་སྲིང་གིས་ཐོབ།།   དམུ་འབྲང་མཐིང་རིས་མིང་གིས་ཐོབ།།   མུན་ཤེལ་སྣ་དགུ་སྲིང་གིས་ཐོབ།།   ལྷ་རྟ་ངང་དཀར་མིང་གིས་ཐོབ།། ནག་ཆུང་རྟིང་དཀར་སྲིང་གིས་ཐོབ།། ལྷ་གཡག་ཞོལ་ཆེན་མིང་གིས་ཐོབ།། རོག་ཆུང་རྟིང་དཀར་སྲིང་གིས་ཐོབ།།   དཔལ་དོན་ངོ་དམར་མིང་གིས་ཐོབ།།   དཀར་མོ་འཚལ་མིག་སྲིང་གིས་ཐོབ།། ཁྱུང་དཀར་མཛོ་ཕོ་མིང་གིས་ཐོབ།། རྟོལ་པོ་རག་ཡོན་སྲིང་གི་ཐོབ།། ཕྱར་ར་ཞལ་དཀར་མིང་གིས་ཐོབ།།   མཛོ་མོ་ཁ་སྐྱ་སྲིང་གིས་ཐོབ།།   དེ་ནས་མགོའི་ལྷ་བགོས་པ།།   ཕོ་ལྷ་རྒྱང་དགུ་མིང་གིས་ཐོབ།།   མོ་ལྷ་སྲིང་བཅུ་སྲིང་གིས་ཐོབ།། ཁྲབ་རྨོག་གོ་གསུམ་མིང་གིས་ཐོབ།། བལ་འཕང་སྐུད་གསུམ་སྲིང་གིས་ཐོབ།། ཕོ་ཆས་ཁྲལ་ཁྲོལ་མིང་གིས་ཐོབ།། མོ་ཆས་སལ་སིལ་སྲིང་གིས་ཐོབ།། གཏན་གྱི་ཕ་ཡུལ་མིང་གིས་ཐོབ།།   མི་ཡུལ་སྐྱ་མོ་སྲིང་གིས་ཐོབ།། མིང་པོའི་ཕྱ་ཕྱིར་སྲིང་མོས་དཔལ་མོ་གྲོལ།། སྲིང་མོའི་དཔལ་ཕྱིར་མིང་པོས་ཕྱ་མ་གྲོལ།། ལྷ་བོན་ཐོད་དཀར་ཞལ་ན་རེ།། མིང་སྲིང་ལྕམ་དྲལ་ཚུར་གསོན་དང་།།   མིང་པོས་ཕ་ཡུལ་འཛིན་པ་འདི།། སྲིད་པ་སྐོས་ཀྱིས་བཞག་པ་ཡིན།། བུ་མོ་མི་ཡུལ་འགྲོ་བ་འདི།། དེ་ཡང་འགྲོ་བའི་བརྒྱ་ལམ་ཡིན།། མིང་སྲིང་དཔལ་བགོས་བྱས་པ་ལ།། རང་རང་ཐོབ་པའི་སྐལ་རེ་ཡོད།། རང་རང་ཕྱག་ཏུ་འབུལ་གྱིས་བཞེས།། 
ཀྱེེ། དཔལ་བཤོས་ཟུར་གསུམ་མངའ་ཐང་ཅན།། གངས་དཀར་ཏི་ཙེ་འདྲ་བ་ཡིན།། ལྷ་གཡག་དཀར་པོ་གཡུ་རྭ་ཅན།། དཔག་བསམ་ལྗོན་ཤིང་འདྲ་བ་ཡིན།། དཔལ་མདའ་དར་གྱིས་བརྒྱན་པ་འདི།། ཡབ་ཀྱི་དཔལ་དུ་འཇོག་པ་ཡིན།། ཡབ་སྐུ་ཚེ་བསྲིང་བའི་རྟེན་མཛོད་ཅིག།   དཔལ་བཤོས་འབྲང་རྒྱས་ཞལ་དཀར་འདི།། མ་པང་གཡུ་མཚོ་འདྲ་བ་ཡིན།། དཔལ་ཆང་བདུད་རྩི་འཁྱིལ་བ་འདི།། ཡུམ་གྱི་རྟེན་དུ་འཇོག་པ་ཡིན།། ཡུམ་སྐུ་ཁམས་བཟང་བའི་རྟེན་འཛོད་ཅིག། དང་བོ་བུ་ཅིག་སྐྱེས་ཙམ་ན།།   སྔས་སུ་མདའ་ཞིག་ཐར་གྱིས་བཙུགས།། སྲོག་མདའ་ཉ་མིག་བྱ་བ་ལགས།།   ཕོ་སྲོག་མདའ་ལ་བརྟེན་པ་ཡིན།།   བཀྲ་ཤིས་དཔལ་མདའ་སྒྲོ་དཀར་གྱི།། མདའ་ལྟོང་གནམ་དུ་བསྟན་པ་འདི།།   མངའ་ཐང་དགུང་དང་མཉམ་པ་ཡིན།།    སྒྲོ་ཡི་ཡུད་གསུམ་ཀྱོན་པ་འདི།། མི་ནོར་ཟས་གསུམ་འཕེལ་བའི་དོན།། སྙུག་མ་ཚིགས་གསུམ་ཡོད་པ་འདི།། ལུས་ངག་ཡིད་དང་གསུམ་པོ་ཡིན།། མཚལ་དམར་མདངས་དང་ལྡན་པ་འདི།།   ཁ་དོག་མདངས་དང་ལྡན་པ་ཡིན།།   དར་ཚོན་སྣ་ལྔས་བརྒྱན་པ་འདི།། དབང་པོ་སྒོ་ལྔ་ལྡན་པ་ཡིན།།   སྲིད་པའི་དཔལ་མདའ་སྒྲོ་དཀར་འདི།། ཇོ་བོའི་ཕྱག་ཏུ་འབུལ་གྱིས་བཞེས།། མ་ལ་བུ་མོ་སྐྱེས་ཙམ་ན།། སྔས་སུ་འཕང་ཞིག་ཐར་གྱིས་བཙུགས།། བཀྲ་ཤིས་གསེར་འཕང་གཡུ་ལོ་འདི།།   སྐེད་པ་འཛུམ་ལ་འདྲིལ་བ་འདི།། ནོར་ཟས་གཡང་དང་ལྡན་པ་ཡིན།།   གཡུ་ཡི་འཕང་ལོ་བསྐོར་བ་འདི།། འཁོར་གཡོག་མདངས་དང་ལྡན་པ་ཡིན།། འཕང་བཏེག་རྡོ་ལ་བྱས་པ་འདི།། མོ་སྲོག་རྡོ་ལས་སྲ་བ་ཡིན། བཀྲ་ཤིས་གསེར་འཕང་གཡུ་ལོ་འདི།།   བུ་མོ་སྲིང་ལྕམ་ཕྱག་ཏུ་འབུལ།།   དཔལ་ཤ་ལག་ངར་གཞུ་མཆོག་འདི།། བུ་སྲིང་དཔལ་དང་ལྡན་པ་ཡིན།། འདི་ཡང་བུ་མོའི་ཕྱག་ཏུ་འབུལ།། སྐུ་ཚེ་བསྲིང་བ་ལྷ་ཡིས་གནང་།།   ལྷ་གྲལ་འདི་ལ་ཕྱག་གསུམ་འཚོལ།། ཚེའི་བར་ཆད་གཤེན་གྱིས་སེལ།། སྐུ་གཤེན་བོན་ལ་ཕྱག་གསུམ་འཚོལ།།   གདུང་རུས་དཀར་པོ་ཡབ་ཀྱིས་བྱིན།།   དྲིན་ཅན་ཡབ་ལ་ཕྱག་གསུམ་འཚོལ།། བཀྲག་དང་གཟི་མདངས་ཡུམ་གྱི་བྱིན།། དྲིན་ཅན་ཡུམ་ལ་ཕྱག་གསུམ་འཚོལ།།   ཁ་དྲག་དཔུང་གཉེན་མིང་གིས་བྱིན།། དྲིན་ཅན་མིང་ལ་ཕྱག་གསུམ་འཚོལ།། གསེར་རི་དེ་ནི་དཀྱིལ་སྐོར་ལ།།   སྐྱིད་པ་ཡོང་གི་སྐོར་གསུམ་གྱིས།། གཉེའུ་ལྷས་བྱས་པ་ཡིན།། སྣ་བོན་གཤེན་གྱིས་བྱས་པ་ཡིན།། འོག་རྟ་དཀར་ལ་བྱས་པ་ཡིན།། ཡབ་ཅིག་ལྷ་རྗེ་ཞལ་ན་རེ།།   གཉེའུ་མི་བདུན་ཚུར་གསོན་དང་།། སྐྱིད་པའི་སྒོ་ལ་དར་ཅིག་ཐོགས།།   གཉེའུ་དེ་ནི་མི་བདུན་གྱིས།། སྐྱིད་པའི་སྒོ་ལ་དར་ཅིག་བཏགས།།    བུ་མོ་དེ་ནི་འཕྲུལ་ལྕམ་གྱིས།། མཐུ་བ་དེ་ནི་གཡས་པ་ལ།། དར་དཀར་དེ་ནི་ཡུག་ཅིག་བཏགས།། བུ་མོ་སྐྱིད་པའི་ཡུལ་དུ་ཁྲིད།།  མི་ཡུལ་རྒྱ་ཡུལ་བརྟན་བཟང་ན།། མིའི་དཔལ་མོ་ཁྱོད་ཀྱིས་གྱིས།། དེ་རིང་རྒྱུ་སྦྱོར་ཡོན་བདག་གི།   ཕྱ་དེ་ཡང་མ་འབྲལ་པར་བཞུགས།།   གཡང་དེ་ཡང་མ་འབྲལ་བརྟན་པར་བཞུགས།།      
 
 
པར་ལྡན་འོས་སྦྱོར།